Полный Тропарион. Том II

Пра́востию у́мною ду́шу твою́ привяза́вши в любо́вь Христо́ву,/ тле́нных и кра́сных и вре́менных забы́тием претекла́ еси́, /я́ко Сло́ва учени́ца,/ поще́нием стра́сти пе́рвее умертви́вши,/ страда́льчески второ́е врага́ посрами́ла еси́./ Тем Христо́с сугу́бых венце́в сподо́би тя,/ сла́вная Евдоки́е, преподо́бная страстоте́рпице,/ моли́ Христа́ Бо́га спасти́ся душа́м на́шим.

Во страда́нии твое́м до́бре подвиза́вшися,/ и по сме́рти нас освяща́еши чуде́с излия́нии, всехва́льная,/ ве́рою прибега́ющий в Боже́ственную це́рковь твою́,/ и торжеству́юще мо́лим тя, преподо́бная му́ченице Евдоки́е,/ да изба́вимся неду́г душе́вных и чуде́с благода́ть почерпе́м.