Наши святые врачи - страница 16
П росвети́стеся, я́коже добросия́нное, безсре́бреницы, зла́то, Боже́ственною благода́тию исцеле́ний обогати́сте мно́жества. Тем уще́дрите ны, обурева́емыя лю́тых нахожде́ний искуше́ньми.
Припев: Святии чудотворцы и безсребреницы Космо и Дамиане, молите Бога о нас.
П реложи́вше Го́споду чи́сты ва́ша ду́хи, безсре́бреницы, дар от Него́ прия́сте нечи́стыя ду́хи прогони́ти всегда́, и́хже зло́бы го́рькия изба́вите всех нас.
С лава: Усну́сте пра́ведно до́лжным сном, му́дрии безсре́бреницы, и неусы́пнии моли́твенницы есте́ о ве́рных; тем душ на́ших при́сно и теле́с лю́тыя стра́сти успи́те*.
И ныне: Моля́щи не преста́й Человеколю́бца, Бо́га на́шего, Всенепоро́чная, я́ко да прии́мем всеконе́чне отпуще́ние злых и получи́м на Небесе́х угото́ванная блага́я лю́бящим Его́.Песнь 8
Ирмос: Из пла́мене преподо́бным ро́су источи́л еси́ и пра́веднаго же́ртву водо́ю попали́л еси́, вся бо твори́ши, Христе́, то́кмо е́же хоте́ти: Тя превозно́сим во вся ве́ки.
Припев: Святии чудотворцы и безсребреницы Космо и Дамиане, молите Бога о нас.
Н еду́гов вся́ческих су́ще ра́тницы, посо́бием Боже́ственнаго Ду́ха, святи́и, утоли́те на́ших душ неду́гования и теле́с облегчи́те боле́зни.
Припев: Святии чудотворцы и безсребреницы Космо и Дамиане, молите Бога о нас.
В и́дителие Госпо́дни ны́не красоты́ су́ще и́стинно, присеща́йте сей кра́сный богоно́сный храм ваш и исто́чник чуде́с мно́гих соверша́йте.
Припев: Святии чудотворцы и безсребреницы Космо и Дамиане, молите Бога о нас.
О т исто́чника ра́йска исходя́ще, я́ко ре́ки две, все напая́ете лице́ земли́ исцеле́ний струя́ми, неду́гов изсуша́юще ту́чи.
Припев: Святии чудотворцы и безсребреницы Космо и Дамиане, молите Бога о нас.
Б лаже́нныя наде́жды прии́мше, от всех досто́йно блажи́теся*, я́ко испо́лнителие, блаже́ннии, Бо́га на́шего Боже́ственных хоте́ний, безсре́бреницы я́вльшеся.
С лава: Вра́чеве неисце́льных страсте́й, безсре́бреницы, неисце́льныя стра́сти на́ша исцели́те, и искуше́ний бу́рю утоли́те, и уны́ния разжени́те о́блаки.
И ныне: Со А́нгелы святы́ми песносло́вим Отца́ и Сло́ва и Ду́ха Свята́го, Еди́но в Трех Ипоста́сех Божество́, Еди́но Ца́рство и Еди́ну Власть.Песнь 9
Ирмос: Бо́га челове́ком невозмо́жно ви́дети, на Него́ же не сме́ют чи́ни А́нгельстии взира́ти; Тобо́ю бо, Всечи́стая, яви́ся челове́ком Сло́во воплоще́нно, Его́же велича́юще, с Небе́сными во́и Тя ублажа́ем.
Припев: Святии чудотворцы и безсребреницы Космо и Дамиане, молите Бога о нас.
С ей храм ваш чудесы́ всеблаголе́пно, я́ко звезда́ми све́тлыми, украша́ется и, согла́сно веселя́ся, всегда́ блажи́т и честну́ю ва́шу па́мять пра́зднует благоче́стно, честни́и безсре́бреницы.
Припев: Святии чудотворцы и безсребреницы Космо и Дамиане, молите Бога о нас.
Я́ко свет, я́ко два вели́ка со́лнца, разу́мную твердь украша́ете, безсре́бреницы, и зна́мений заря́ми просвеща́ете всех ве́рных сердца́. Тем зове́м: разреши́те тьму страсте́й на́ших, мо́лимся.
Припев: Святии чудотворцы и безсребреницы Космо и Дамиане, молите Бога о нас.
В се́ла вы́шняя [73] вселя́еми, святи́и, посреде́ нас бы́ти неви́димо милосе́рдуйте, и́же посреде́ Боже́ственнаго хра́ма ва́шего пе́сни возсыла́ющих Вседержи́телю и блажа́щих приле́жно вас, всехва́льнии.
С лава: Земля́ с Вы́шними весели́тся в све́тлый Боже́ственный пра́здник ваш, святи́и: его́же соверша́ющих, нас изба́вите тьмы, и боле́зней, и вся́кия тесноты́ и е́же во а́де лю́таго, му́дрии, муче́ния.
И ныне: Тре́петное рожде́ние иму́щи, Всечи́стая, в Стра́шный день испыта́ния, молю́ся, стра́шнаго отве́та изба́ви мя и спаса́емых стоя́ния прича́стника сотвори́, ве́рно пою́ща Тя, Богора́дованная.Молитва [74] О чудотво́рцы сла́внии, вра́чеве безме́зднии, Космо́ и Дамиа́не! Вы, от ю́ности Христа́ Бо́га возлюби́вше, не врачева́ния то́кмо иску́сство, но па́че неоску́дную благода́ть исцеле́ния вся́ких неду́гов от Бо́га прия́ли есте́. Те́мже и нас, пред честно́ю ико́ною ва́шею припа́дающих, ско́ро услы́шите. Ю́ныя де́ти, ва́шея по́мощи во уче́нии кни́жнем прося́щия, моли́твами свои́ми наста́вите, да ва́шему житию́ ревну́юще, не земно́е то́чию* приобря́щут, но па́че во благоче́стии и пра́вей ве́ре непреста́нно да преспева́ют. На одре́ боле́зни лежа́щим, в челове́честей по́мощи отча́явшимся, к вам же те́пле с ве́рою и усе́рдною моли́твою прибега́ющим, исцеле́ние боле́зней ва́шим ми́лостивым посеще́нием да́руйте: та́кожде и от лю́тых неду́г во уны́ние, малоду́шие и ропта́ние прише́дшия да́нною вам от Бо́га благода́тию в терпе́нии утверди́те и наста́вите, да уразуме́ют во́лю о них Бо́жию святу́ю и соверше́нную, и прича́стницы соде́лаются Бо́жия спаси́тельныя благода́ти. Бра́тию свята́го хра́ма сего́ [75] , ва́шему свято́му заступле́нию от Бо́га вруче́нную, и всех к вам усе́рдно прибега́ющих от боле́зней лю́тых невреди́мы сохрани́те, и от внеза́пныя сме́рти огради́те, и мо́щным хода́тайством ва́шим к Бо́гу в пра́вей ве́ре тве́рды соблюди́те, во благоче́стии же преспе́юща, да с ва́ми вку́пе сподо́бятся в бу́дущем ве́це при́сно воспева́ти и сла́вити всесвято́е и великоле́пое и́мя Отца́ и Сы́на и Свята́го Ду́ха во ве́ки веко́в. Ами́нь.